El Conceyu de Cultura Tradicional Vezos Astures naz nel añu 1999 como asociación que tien por oxetivu recoyer, estudiar y espublizar el conxuntu de tradiciones asturianes, especialmente los aspeutos rellacionaos cola música, el baille y los elementos etnográficos que lleven empareyaos.
El colectivu plantégase como prioritariu’l llabor de recoyida de datos sobre bailles, melodíes, preseos, indumentaria antigua, costumes, etc. al traviés del contactu con informantes que conocieron vives les tradiciones que rellaten. Con ello conseguimos ser llazu trasmisor de la cultura asturiana ente les xeneraciones pasaes y les futures, polo que les actividaes que desenvolvemos tán dirixíes a toos aquellos (persones, entidaes, escolares, asociaciones) que quieran averase a la tradición d’Asturies.
En Vezos Astures consideramos coles mesmes bien importante la xera de divulgación de la tradición y por ello desenvolvemos distintes actividaes:
– Conciertos, amueses de folclore y talleres nos que se reproducen los bailles, los ritmos, les melodíes y les técniques de percusión de tola xeografía d’Asturies.
– Cursos, conferencies y publicaciones sobre los distintos aspeutos de la cultura tradicional.
– Esposiciones y talleres de distintes materies: el filáu, indumentaria, xuegos tradicionales, bailles, mazcaraes d’iviernu, ritos de pasu, etc.
– Trabayos d’investigación y espardimientu de calter etnográficu sobre’l baille y les mazcaraes d’iviernu.
La molición pola busca de nuevos recursos y l’usu de formatos variaos y modernos qu’ameyoren el procesu de tresmisión, llevónos a la edición d’un DVD didácticu sobre’l baille na tradición asturiana y d’otru sobre les mazcaraes d’iviernu nel suroccidente d’Asturies.
Xunto con otros colectivos de baille y persones averaes al baille y la música asturianes entamamos, nel 2015, a organizar les Nueches en Danza, xuntances nes que el baille y la música recuperen el so usu tradicional.
Dende 2023 collaboramos na organización de les Xornaes d’estudiu del paxellu asturianu «Luis Argüelles» con trabayos espublizaos nes coleiciones del Muséu del Pueblu d’Asturies.
Toes estes actividaes faenles los componentes de Vezos Astures, ente los que s’atoparon y atopen historiadores, etnógrafos, filólogos, folcloristas, artesanos, lutieres ya investigadores de la cultura tradicional oral, trabayando toos ellos con dedicación y interés nel estudiu de los nuesos raigaños, cola única finalidá de compartir la conocencia y contribuyir ente toos a caltener la riqueza cultural asturiana.
Coles mesmes les pandereteres de l’asociación collaboraron con distintes entidaes y persones individuales, como ye’l casu de Hevia, Xuacu Amieva, Ramón Prada, el Muséu Etnográficu del Oriente de Asturias, amás de pertenecer al colectivu Muyeres, col que realizaron dellos trabayos discográficos del mesmu nome y llevaron la música tradicional asturiana a importantes festivales internacionales de música.
El trabayu de Vezos Astures nel espardimientu y recuperación de la cultura tradicional llevó al collectivu a recibir nel añu 2009 el Premiu al Grupu cola Meyor Trayectoria, concedíu pola Televisión del Principáu d’Asturies. Tamién el Centru Asturianu de Madrid tuvo a bien condecénos el Urogallu de Bronce nel 2004.