Vezos Astures quier ser llazu trasmisor de la cultura asturiana ente les xeneraciones pasaes y les futures, polo que les actividaes que desenvuelve tán dirixíes a toos aquellos (persones, entidaes, escolares, asociaciones) que quieran averase a la tradición d'Asturies. Esti llabor de divulgar la tradición faise pente medies d’estremaes actividaes como:
- Conciertos, amueses de folclore y talleres nos que se reproducen los bailles, los ritmos, les melodíes y les técniques de percusión de tola xeografía d'Asturies.
- Cursos, conferencies y publicaciones sobre los distintos aspeutos de la cultura tradicional.
- Esposiciones y talleres de distintes materies: el filáu, xuegos tradicionales, bailles, mazcaraes d'iviernu, ritos de pasu, etc.
- Trabayos d'investigación y espardimientu de calter etnográficu sobre'l baille y les mazcaraes d'iviernu.
- La molición a la gueta de nuevos recursos y l'usu de formatos variaos y modernos qu'ameyoren el procesu de tresmisión llevónos a la edición d'un DVD didácticu sobre'l baille na tradición asturiana y d'otru sobre les mazcaraes d'iviernu nel suroccidente d'Asturies.
Toes estes actividaes desendólquenles los componentes de Vezos Astures, ente los que s'atopen historiadores, etnógrafos, filólogos, folcloristes, artesanos, constructores d’instrumentos ya investigadores de la cultura tradicional oral, coles mesmes les pandereteres de l'asociación collaboren con distintes entidaes y persones individuales, como ye'l casu d’Hevia, Xuacu Amieva, Ramón Prada, Tuenda, el Muséu Etnográficu del Oriente, amás de pertenecer a l'Asociación de Música Tradicional MUYERES, cola que realizaron dellos trabayos discográficos del mesmu nome y llevaron la música tradicional asturiana a importantes festivales internacionales de música.
El trabayu de Vezos Astures nel espardimientu y recuperación de la cultura tradicional llevó al colectivu a recibir nel añu 2009 el premiu al grupu cola meyor trayectoria, concedíu pola Televisión del Principáu d'Asturies, l'Urogallu de bronce concedíu pol Centro Asturiano de Madrid en 2003, grupu de baille nel Festival Intercélticu de Lorient nel añu 2003, añu dedicáu a Asturies, o la Nuit Celtique 2003 nel estadiu Saint Denis de París compartiendo escenariu con Lyam O’Flym, Alan Stivell, Carlos Núñez o Sinead O’Connor.