:: El Conceyu de Cultura Tradicional Vezos Astures tien como oxetivu fonderu la investigación etnográfica, la recuperación y el espardimientu de les tradiciones populares d´Asturies. Esti conceyu quier ser llazu tresmisor, ente les xeneraciones pasaes y les futures de la cultura asturiano, poro, les actividaes que desendolca tan empobinaes a toos aquellos, persones, entidaes, escolinos, asociaciones... que-yos pete averase a cualesquier estaya de la nuesa tradición. El Conceyu fae abondes xeres col finxu d'algamar n´elles too lo rellacionao cola tradición y el folclore asturiano, asina, los aconceyaos igüen esposiciones d´indumentaria tradiconal, charres y conferencies de calter etnográficu, talleres de filao , talleres de xuegos tradicionales, taller de bailles agarraos, Teatru y Muesa de folclor. Toles actividaes nagüen por "interactuar" cola xente a la gueta siempre d´esi espardimientu de la cultura tradicional, únicu camín, camentamos, que llevará les tradiciones y el folclor un poquiñin más allá de les nueses xeneraciones. Dende lluéu, esto fáenlo los aconceyaos de Vezos Astures con plenu conocimientu: hestoriadores, etnógrafos, filólogos, folcloristes, luthiers ya investigadores de la cultura tradicional oral; toos ellos, de llargu y continuu interés y estudiu de los nuesos raigaños, nes estremaes estayes yá falaes, llogren arimar a toos y toes les tradiciones cenciella y afayaízamente.