:: Taller de xuegos tradicionales
Desendolcamos xuegos tradicionales con enfotu folixeru pero tamién col enfotu de espertar interés polos nuesos vezos.
Dellos xuegos que facemos empobinaos a críos son, por exemplu, el ferreru, el zapatu, les cuatro esquines... Y ensin escaecenos de los más grandinos, tiru cuerda, el pañuelu, rana, llave, bolos… bailles xuegu como el boleru, la carrasquiña, los cachitíos...

:: Taller de llana
Colos aperios necesarios pa los trabayos de la llana Vezos Astures amuesa la xera qu´antañu se facía pa iguar les teles y dempués la ropa. Fusos, rueques, tintes, llana, cardes...

:: Taller baille tradicional
Los bailles que se facíen nes romeríes tradicionales llévalos Vezos a toos los que-yos pete deprender cómo los nuesos güelos baillaben, cortexaben y taben de folixa.
Dientro d´esti taller amosamos bailles a lo sueltu: xotes, muñeires, dances… pero tamién a lo agarráo: pasudoble, rumba, valsiáu, tango… bailles qu´entamaren na nuesa tradición cola apaición d' instrumentos como l´acurdión o el clarinete y en munchos casos adautaos a la voz y pandereta.

:: Esposiciones d´indumentaria
La indumentaria ye un aspeutu perimportante pa la nuesa tradición, el traxe tradicional asturianu nun ye otru que la cabera forma vistir que se reconoció como propia de los asturianos dende mediaos del sieglu XVIII fasta mediaos del XIX, siendo na segunda metada d'ésti y entamos del XX cuando va sustituyéndose esti mou de vistir por otru más xeneral a toa Europa como desendolcu de la industrialización.
Vezos igua esposiciones d´indumentaria de mou educativu faciendo una percuidada muesa de prendes, diendo dende la ropa interior: calzón, camisa, medies… fasta el traxe completu: calzón, xilecu, xustiyu, dengue, pañuelu, montera, xoyes, reloxes…, desplicáo too ello y con bayura de pieces qu'algama tola indumentaria tradicional asturiana, dando asina una visión de conxuntu al visitante de la esposicón.

:: Filandón
La obra “El Filandón” que lleva a escena el C.C.T. Vezos Astures ta sofitada nel cuadru del pintor Álvarez Catalá “Filandón en Monasterio de Ermo”; asina, la obra desendolca, partiendo de la escenificación d´esti cuadru, too lo que nos filandones, filas, filorios, h.ilas o h.ilorios se facía.
Too lo qu´espeya “El Filandón” son trabayos, cantares, xuegos, etc... recoyíos de la tradición y representaos talamente equí, nuna cadarma teatral qu´amuesa el braeru marcu d´eses actividaes.
El filu que cuese la obra ye un testu dramáticu iguáu por Vezos Astures y que nun queremos seya´l remane de la representación, porque lo fondamente importante ye la tradición.

:: Muesa folclor
El conceyu de cultura tradicional Vezos Astures, quier ufiertar un percorríu pel folclor d'Asturies, espectáculu nel que s´amuesen los bailles, dances, cancios, ramos, cantares de boda, etc... d' Asturies, too ello acompangao colos instrumentos tradicionales, gaita, tambor, panderos, panderetes y voces; asina como una muesa del traxe tradicional asturianu femenín y masculín.
Ramu (Oriente u Occidente), Corri Corri (Cabrales), Pericote (Llanes), Xotagallegada (Oriente), Romances, Xota (Centru), Muñeira (Centru), Saltón (Centru), Cantar de Boda, Media Vuelta (Brañas de Valdés y Tinéu), Gallegada (Brañas de Valdés y Tinéu), Son (Cangas del Narcea), Xota Corrida (Occidente), Muñeira (Tormaleo), Xota (Occidente), Danza (Oriente u Occidente), son dellos sones y bailles que igüen la nuesa muesa de folclor.
.